'காட்டுப் பய' கவிதைகள்

2011-04-09T08:03:00.001+05:30

காட்டுப் பய கவிதைகளுக்கு குட் பை..!

நன்றி!

2010-11-25T20:00:00.003+05:30

முதுமை

என்ன இருக்கிறது என்னிடம்?
கிழிந்துபோன நார் கட்டிலும்
பித்தளை டம்ளருமாக கிடக்கிறேன்.
சத்தியமாய் வேலைகள் இல்லை.
எல்லாம்  முடித்தாகிவிட்டது.

எழுந்து செல்ல முடியவில்லை.
பிள்ளைகளோ, பேரன் பேத்திகளோ
தூரத்தில் நிழலாய்த்தான்  தெரிகிறார்கள்.
மகராசியோ முன்னமே போய்ச்சேர்ந்துவிட்டாள்.

மூக்கின் வழியே நுழையும் காற்று மட்டும்
சுயநலம் பாராது என்னைத் தொடுகிறது.
கைகளால் விரட்டியும் கூட காப்பாற்றுகிறது.
ஒன்றுமில்லாமல் ஆவதுதான் ஒரே வழி.

கடைசியாய் வரும் நால்வராவது
வருவார்களாத் தெரியாது.
வந்தாலும் அவர்களுக்கு கொடுக்க
என் உயிரைத்தவிர வேறொன்றுமில்லை.

மழையினால்

2010-11-19T18:17:00.000+05:30

பட்டுபோய்விட்ட ஒரு மரம்
வெட்டப்பட்டது.
மழை இல்லை, நீர் இல்லை
முடிந்து போனது.

ராஜா ராணி கதைகள்
சொல்லும் பாட்டி.
வெயிலடிக்கும் ஏப்ரலில்
இறந்து போனாள்.

மழை வந்திருந்தால்
பாட்டியும் இருந்திருப்பாங்க
எனறாள் செல்ல மகள்!

--
காட்டுப் பய

ம்மா, பாப்பா எப்படி பொறக்குது?

2010-11-13T22:47:00.000+05:30

நடுநிசியில் நட்சத்திரமொன்று
நடுவீட்டில் குழந்தையானதென்றும்,

பள்ளி சென்ற வேளையில்
கடவுள் கொடுத்துவிட்டுப்
போனாரென்றும்,

மருத்துவமனையில் வயிறு கீறி
வரவழைக்கப்பட்டதென்றும்,

பிறப்பின் ரகசியத்தை
அறியத் துடிக்கும்
குழந்தைக்கு சொல்லியும்
திருப்திபடாது அக்குழந்தை.

கேள்வியை தவிர்க்க
ஒன்றோடு நிறுத்தியிருக்கலாம்!

பக்கத்து வீட்டிலும்
குழந்தை பிறக்குமென்பதை
தடுக்க முடியாது!

--
காட்டுப் பய

காதலும் காமமும்

2010-11-11T11:49:00.000+05:30

"நீ அழகு" என்பது
என் முதல் பொய்
கன்னத்தில் குழி விழ
அழகாகச் சிரித்துவிட்டுப்
போனாய்.

நான் உனக்கான பொய்களை
தேட ஆரம்பித்தேன்.

உன் கன்னக்குழி அழகில்
விழுந்த என்னை
குழியிலிருந்து
மீண்டு வர விடாதே
என்றேன்.

கண்களில் நீர் வரச் சிரித்தாய்.

அய்யோ.. உன் கண் மீறும்
கண்ணீர்த் துளிகள் கதறுகிறதே
உன்னை விட்டுப் பிரிவதால்..
என்றேன்.

என் கன்னத்தில் உதடு குவித்து
சிரித்தாய்.

உன் இதழ்களின் மென்மையை
உணர்ந்த என் கன்னம்
உதடுகளிடம் சொல்ல
உதடுகளும் உணரத் துடிக்கிறது
என்றேன்.

முகம் பொத்தி வெட்கம் கொண்டாய்.

முகம் மூடாதே..
உலகம் இருண்டு விட்டது
என்றேன்.

என்னை இறுக கட்டிக் கொண்டாய்.

என்னை நீ போர்த்திக்கொள்
போதும்
உன் உடைகள் எதற்கு
என்றேன்.

ச்சீய்.. என்றாய்.

கொட்டிக்கிடக்கும்
இதுபோன்ற அழகை
எங்குமே பார்த்ததில்லை..
வேறெங்கும் இருக்கவும்
வாய்ப்பில்லை
என்றேன்.

போடா.. என்றாய்.

"..."

மௌனம் சாதித்தாய்.

நான் துறவறம் இழந்தேன்.

--
காட்டுப் பய

பாலத்திலிருந்து..

2010-10-31T00:07:00.000+05:30

மேலெழும்புகிற பாலத்தின்
எதிர்திசை வானம்

கீழிறங்கும்போது பின்சென்றுவிடும்
கண்ணுக்குத் தெரியாத
குப்பைகள் நிறைந்த வானம்!

--
காட்டுப் பய

முதல் பார்வை

2010-10-22T18:39:00.000+05:30

பார்த்த முதல் நேரம்
எதிர்பார்வை சர்வாதிகாரம்
கொள்கிறது.

தனித்து எழுகிற தவிப்பை தவிர்க்க
இன்னுமொரு நேரம் கிடைக்காமலா
போய்விடும்!

--
காட்டுப் பய

அல்லக்கா புல்லக்கா ஐஸ்

2010-10-21T04:43:00.000+05:30

கரைகிற பொருளாகவே தோன்றினாலும்

கசிகிற துளிகள் சிறந்த கவிதைகள் போல..

உறிஞ்சும் சந்தோசத்தில் உதிரும் புன்னகையில்

வயது வசப்படாது.

காணாமல் போகும் ஒவ்வொரு வடிவமும்

கண்முன்னே சொல்லும் ஓர் தத்துவம்.

நிரந்தரமில்லை எதுவும்..

சந்தோசமும், சந்தோசத்தில் பிறக்கும் புன்னகையும்.

தெருமுனையில் மீண்டும் கேட்கிறது

ஐஸ் வண்டிக்காரன் குரல்

"அல்லக்கா புல்லக்கா ஐஸ்.."

காட்டுப் பய

கேள்விகள்

2010-10-20T19:56:00.000+05:30

பால் பருவத்தில்..
அம்மா பிடிக்குமா? அப்பா பிடிக்குமா?

பள்ளிப் பருவத்தில்..
அறிவியல் பிடிக்குமா? கணிதம் பிடிக்குமா?

கல்லூரிப் பருவத்தில்..
பொறியியல்லா? மருத்துவமா?

பணிப் பருவத்தில்..
அந்தத் தொழிலகமா? இந்தத் தொழிலகமா? சொந்தத் தொழிலகமா?

திருமண பருவத்தில்..
யுவராணியா? சங்கீதாவா? தேன்மொழியா?

இதுபோல் எத்தனையோ கேள்விகள்..
கேள்விகளில் இல்லை எந்தன் பதில்கள் - மாறாக
கேள்விகள் இல்லை எந்தன் பதில்களுக்கு!

--
காட்டுப் பய

நழுவும் பூக்கள்

2010-09-15T04:23:00.000+05:30

அவளின் கூந்தல் வழியே

நழுவும் பூ ஒன்று.

பூவின் புனிதத்தைக் கெடுக்காமல்

பற்றிவிட நீழும் கை.

கையில் படரும் பூவை

கண்மலர கண்டுணர்ந்து

காதலறிவோம்.

காதலில் கரையறியா அப்பூவின்

நழுவும் நேரம் நாமறியோம்.

அந்நேரம் மேலும் ஒரு பூ

கூந்தல் வழி நழுவத் துவங்கும்.

கைநழுவிய முதல் பூவோ

காற்றில் திசைமாறி

கண்களை விட்டு அகலும்.

இரண்டாம் பூவின் நிலையும் இதேதான்

மூன்றாம் பூ நழுவும்போது.

காட்டுப் பய

ஹலோ, பொய் சொல்லாதீங்க..

2010-09-13T11:47:00.000+05:30

"நான் பொய் சொன்னதேயில்லை"

என்கிறீர்களா?

இதுவும் பொய்தான்.

பொய் சொல்ல யோசிக்க

வேண்டியதில்லை.

பொய் உண்மைகளின் நடுவே

பொதிந்திருக்கிறது.

நீங்கள் எங்கே இருக்கிறீர்கள்

என்கிற கேள்விக்கு

"வீட்டில்" என்று ஒற்றையாய்

பதில் சொல்லிவிடலாம்.

ஆனால், வீட்டின் பிரதான அறையில்

வாசலிலிருந்து பதினாறாவது அடியில்

நாற்காலியில் அமர்ந்திருக்கிறேன்

என்று சொல்லியிருக்க வேண்டும்.

நீங்கள் எங்கே வந்துகொண்டிருக்கிறீர்கள்

என்கிற கேள்விக்கு

"வேளச்சேரி" என்று

பதில் சொல்லிவிடுவது சுலபம்தான்.

ஆனால், வேளச்சேரியை தாண்டி

246-வது மீட்டரில்

இந்த கடை உள்ள பகுதியை

தாண்டிக்கொண்டிருக்கிறேன்

என்று சொல்லியிருக்க வேண்டும்.

நேற்று ஏன்டா அழைப்பை எடுக்கவே இல்லை

என்கிற கேள்விக்கு

"அவசர வேலை" ஒன்றில் இருந்தேன் என்கலாம்.

ஆனால், உன் தங்கையுடன்

மெரினா கடற்கரையில்

சுண்டல் சாப்பிட்டுக்கொண்டிருந்தேன்

என்று சொல்லியிருக்க வேண்டும்.

ஆம், நீங்கள் பொய் சொல்ல கற்றுக்கொண்டீர்கள்.

ஆனால் இத்தனை பொய்களையும் தாங்கிய

அலைபேசி மட்டும்

உங்களிடம் உண்மையாய் இருக்கிறது

அது செத்துப் போகும் வரை..

காட்டுப் பய

அவளின் நினைவுகள்!

2010-08-15T00:43:00.000+05:30

எட்டாம் அகவையில் அவள் என்னருகில்

அமர்ந்திருந்தாள்..

எப்படி?

ஓடிப்போய் நான்தானே அவள் அருகில்

அமர்ந்தேன்..

பத்தாம் அகவையில் பச்சைக் குத்திக்கொண்டேன்

அவள் நினைவால்..

எப்படி?

Reynolds பேனாவின் நீல நிற மை எனது மார்பில்

அதுவே பச்சை..

பனிரெண்டாம் அகவையில் கிடைத்தது

இரண்டு கோழி முட்டைகள்..

எப்படி?

சத்துணவு ஆயாவிடம் ஒரு கைக்கு தெரியாமல்

மறு கையிலும்..

பதினான்காம் அகவையில் அவள் என் பின்னால்

அமர்ந்திருந்தாள்..

எப்படி?

அப்பாவிடம் அடிவாங்கி புது சைக்கிள்

வாங்கி இருந்தேன்..

பதினாறாம் அகவையில் இருவருமே

பிரிந்துவிட்டோம்..

ஏன்?

சனியன்.. என்கூடவே சுத்திட்டு இருந்தவ

எப்படியோ படிச்சு பத்தாப்பு பாஸ் பண்ணிட்டா..

நாசமாப் போக..

காட்டுப் பய

விசித்திரமான வாழ்க்கை

2010-08-15T00:15:00.000+05:30

வாழ்க்கை மிக விசித்திரமான ஒன்று..

தேடிக்கொண்டே இருக்கிறேன் ஏதோ ஒன்றை..

அது கிடைத்ததுபோல் தெரிந்தது..

இருக்கிறது.. இருக்க மட்டுமே செய்கிறது..!

மனசு ஏங்கி மனிதம் துடிக்கிறது..

ஓடித் திரிந்து ஒளிந்து கொள்கிறது..

உயிர் செயல் புரியும் போது,

புலன்கள் அடங்கிப் புரியும்..

மனிதம் அடங்கித் தெரியும்..

ஆகவே..

தேடிக்கொண்டே இருக்கிறேன் ஒன்றை

கனவுகளுடன்!

கிடைக்கவில்லை எனில்..

சுழற்றிய எந்தன் விழி மூடி..

சுற்றும் உலகம் காண மாட்டேன்.

அப்துல் அய்யா வழி நான்..

கனவுகள் காண மட்டுமே நான்!

காட்டுப் பய

"காட்டுப் பய" கவிதைகள்

2010-07-26T13:59:00.000+05:30

காயப்போட்டவை

ஆரவாரமில்லாத மழை

ஆசையில் நனைகையில்

ஞாபகம் வருகிறது

காயப்போட்ட துணிகள்!

***

பிழைப்பு

மார்கழிப் பனியில்

போட்ட கோலத்தில்

மிதிவண்டியை

தயக்கமின்றி

ஏற்றிவிட்டுச் செல்கிறான்

பேப்பர் பையன்

***

மாமியார்

காலா..

சீக்கிரம் எடுத்துப்போ

என் உயிர் வாங்கும்

மருமகளிடமிருந்து.

***

திருட்டு

இந்த கல்யாண வீட்டில்

தொலைத்துவிட்டு

தேடுகிறேன்

ஏதோ ஒரு கல்யாண வீட்டில்

திருடிய செருப்பை!

***

கடவுள்

என்னைக் காக்கும் கடவுள்

அதைக்காக்க

கதவில் பெரிய பூட்டு!

***

அந்த விளையாட்டு

மீட்டலின் இறுதியை

முடிவு செய்யப் போவது

உன் எதிரணிதான்

எதிரணிக்கு நீயும் எதிரணிதான்

இறுதி வடிவம் எதுவானாலும்

வெற்றிதான்

இரு அணிகளுக்குமே!

காட்டுப் பய

பரிச்சயம் இல்லாத சொற்கள்

2010-07-23T11:36:00.000+05:30

பரிச்சயம் இல்லாத சொற்களை

கேட்க நேர்ந்திருக்கிறது

அச்சொற்களின் அர்த்தத்தை

நானே உருவகப்படுத்திக் கொண்டிருக்கிறேன்

சிற்சில அகராதிகளிலும்,

செய்யுள்களிலும், உரைநடைகளிலும்

தேடிப்பார்த்துச் சலித்திருக்கிறேன்

அச்சொற்களை உச்சரித்த உதடுகளைச்

சுற்றிய பரப்புகள் மட்டுமே

ஏனோ நினைவில் தங்கிவிடுகின்றன

எதிர்ப்பு நிலைகளில் என்னிடமிருந்தும்

உயிர்ப்பெற்றிருக்கின்றன அச்சொற்கள்

மனதின் நிலையற்றத் தன்மையால்

எங்கெங்குமே

வெளிப்பட்டுக் கொண்டிருக்கின்றன

அச்சொற்கள்..

ஒலியுடனும்..

ஒலி இல்லாமலும்..!

காட்டுப் பய

அவள்

2010-07-21T11:39:00.000+05:30

விநாயகர் கோவிலின் இரண்டாவது விலக்கில்

அவளைச் சந்தித்தேன்

கணநேரத்தில் ஊடுருவிய அவளது அழகை

முழுதும் விழுங்காத கண்களைப் பழிக்கிறேன்

என்னைச் சுற்றிலும் அப்போது

புது வெளிச்சம் பரவியது

ஒரு பழத்தோட்டத்தைக் கண்ட

ஆயிரம் பறவைகள் போல

ஈராயிரம் கண்கள் அவளை

மொய்ப்பதாய் உணர்ந்தேன்

அவளைத் தொடர்ந்த என் மனசு

என்னைத் தூண்டியது

மெல்லென பார்வையைத் திருப்புகிறேன்..

"Oh My God ...!"

அவள்..

என் மனைவி!

[அப்போது ஒலித்த அசரிரீ : கல்யாணத்திற்குப் பிறகு

உன் மனைவியை இப்படி வர்ணிச்சிருக்கியா...?]

காட்டுப் பய

திருவான்மியூர் திருடன்

2010-07-18T14:48:00.000+05:30

[என் மனதில் ஓடிக்கொண்டிருக்கிறது "திருவான்மியூர் திருடன்" என்ற திரைக்கதை.

அதில் வரும் ஒரு பின்னணிப் பாடல் இது. நானே பாடல், இசை, பாடுவது எல்லாமே!

படம் வெளிவந்தால் (!) தயவுசெய்து பார்த்துவிடாதீர்கள்.]

தித்திக்கும் திருவான்மியூர் உனது ஊரு

பக்கத்துல இ.சி.ஆரு போவோம் டூரு

போகுது பாரு பல சொகுசு காரு

அதுக்குள்ள தேடிப்பாரு இருக்கும் சூப்பர் பிகரு

பக்கத்துல டைடெல் பார்க்கு இருக்கு பாரு

நல்லா படிச்சிருந்தா உன் வாழ்க்க ஜோரு ஜோரு!

MGM, VGP, முட்டுக்காடு..

சில்லுனு கடல்காத்து வீசும்போது..

கடற்கரையில் உட்கார்ந்து யோசிச்சி பாரு

உன் வாழ்க்கை உனக்குத்தான் புரியும் பாரு!

மலர்க்கொடி வீட்டுவாசல் தேடி அலைஞ்ச

நினைவுகள் உனக்குத்தான் வருதா வருதா?

தோட்டத்தில் துண்டு பீடி பிடித்த

ஞாபகங்கள் இப்போதும் இருக்கா இருக்கா?

பெற்றோர் சொல் கேளாமல் மீறிக்கொண்டு

மின்னல் போல் ஊரைச் சுற்றிக்கொண்டு

சண்டியனாய் சண்டை போட்டுக்கொண்டு

அலைந்த காலம் மறந்திடுமா?

அவனாய் மாறவும் வழியுமில்லை

மனசாட்சியும் கேள்வி கேட்கவில்லை

ஆண்டவனே நீயும் வருவாயா

அனைத்தையும் மாற்றித் தருவாயா?

காட்டுப் பய

அலைபேசியுடன்

2010-07-16T12:08:00.000+05:30

தன்னிலை மறந்து தலையாட்டும்

நாளைய சமுதாயம்

குறுஞ்செய்தி கொண்டாட்டத்தில்

குனிந்துபோன தலைகள்

சிணுங்கிடும் சிரிப்பொலிகளுக்கு

பின்னே சவச்செய்தி

குழந்தையின் அழுகுரலுக்கோ

அழகான சுபச்செய்தி

இருந்தும்

அன்னையின் பரிதவிப்பும்,

உறவின் எதிர்பார்ப்பும்,

நட்பின் விசாரிப்பும்,

காதலின் கனிவும்

அடங்கிய உலகம் அது

ஒவ்வொருவருடைய

சிம் கார்டிலும் இருக்கிறது

அவரவர் வாழ்க்கை!

காட்டுப் பய

ஜனனத்தின் முடிவில்

2010-07-14T12:40:00.000+05:30

ஜனனத்தின் இயல்பு

ஒரு தீர்க்கமான முடிவை நோக்கிச் செல்கிறது

உயிரின் உன்னதத் தேடல்கள்

வலியின் வைரக்கொடுமைகளை காட்டும்தான்

அன்னையின் ஆழ்கடலில்

அன்பையும் சேகரித்துக் கொண்டிருக்கிறோம்

சின்னச் சின்ன சிரிப்பின் இடைவெளிகளில்

புயலடித்துப் புதைகின்றோம்

இன்னபிற இயல்புகள்

புன்னகையையும் தொலைக்கின்றன

இறையின் வழித்தேடல்களில் விழிநிறைந்து

வீடு சேர்கின்றோம்

செத்துக்கிடக்கின்ற ஒவ்வொன்றும்

பின்னர் வீறுகொண்டு எழுந்துவிடுகின்றன

புரிதலின் தர்க்கங்கள்

புரியாதவையாகவே இருக்கின்றன

ஜனனத்தின் முதலில் அழுதுவிட வேண்டும்

ஜனனத்தின் முடிவில் சிரித்துவிட வேண்டும்.

காட்டுப் பய

ரயில் பயணம் போல

2010-07-11T00:07:00.000+05:30

எனது வாழ்க்கை ரயில் பயணம் போல..

கடந்து சென்ற நிலையங்களில் உறவுகளை விட்டுவிட்டேன்..

உடன் பயணிப்பவர்களும் நிரந்தரமில்லாதவர்கள்..

எனது இலக்கும் வெகு தொலைவில் இல்லை..

காட்டுப் பய

நான் என் காதலியின் நண்பன்

2010-07-09T11:40:00.000+05:30

நான் நண்பனாம் அவளுக்கு!

அவளின் சந்தேகத்தை என்னில் ஏற்றி

என்னை திசைமாற்றிய என் தென்றல்..

நான் உயர என்னை ஏற்றும்

என் ஏணிப்படிகள்..

இது சுடும்.. இதுவேதான் குளிர்ச்சி தரும்

அதிசயமான என் சொந்தம்..

எல்லாம் எனக்கென்று கேட்டபோது சொன்னாள்

"நீ என் உயிர் நண்பன்டா.."

ஆம்..

நான் அவளின் நண்பனும்தான்!

காட்டுப் பய

உயிர்ப்பூ

2010-07-09T11:14:00.000+05:30

மண்ணைத் தொடும் உயிர்ப்பூ

விண்ணைத் தொடலாம்

வீணாகியும் போகலாம்

வேரில் வெந்நீர் ஊற்றுவதோ

உரமிட்டு உயரச் செய்வதோ

தலைகளின் கடமை

கிளைகள் உயர அனுமதியுங்கள்

அவை நிழலாய் மாறக்கூடும்

காட்டுப் பய

விடுதலைப் பத்திரம்

2010-07-07T12:09:00.000+05:30

எனக்கு மட்டுமே விடை தெரிந்த புதிரால்
பிரிதல் ஆரம்பமாயிற்று..

விடுகதைகள் சிலவும் தோன்றலாயின..

தனியிடம் ஒன்றில் தவம் கிடக்க
அதுவே காரணமுமாயிற்று

வெளிப்புறத்து வெண்ணிலாக்களும்
சுடும் சூரியன்களும் சூழ்ந்துவிடாதபடி
புறந்தள்ளுகிறேன்

வியர்வையின் வழியேயும் கண்ணீரின் வழியேயும்
வழிந்து ஓடிவிடாதபடி நினைவுகளை சுமக்கிறேன்

விடுகதைகளுக்கு விடைகண்டு
நீ அருகில் வேண்டுமென்று நினைக்கும்போது
கையிலிருக்கிறது உன் விடுதலைப் பத்திரம்!

--
காட்டுப் பய

வெற்றிடம்

2010-07-01T05:21:00.000+05:30

இருள் சூழும் நேரங்களில் வெற்றிடம் உருவாகிறது

ஒளிக்கற்றைகளைத் தேடி அலைந்துகொண்டிருக்கிறது ஒரு கூட்டம்

ஒவ்வொருவரிடமும் இருக்கிறது தீப்பொறி!

தீப்பொறி பற்ற அந்த வெற்றிடம் தேவைப்படுகிறது

வெற்றிடம் உருவாக அந்த இருளும் அவசியமாகிறது!

காட்டுப் பய

கல்லூரி வாழ்வின் கடைசி துளி (2)

2010-05-24T15:45:00.000+05:30

நேற்றைய இரவுக்காட்சியொன்றின்

இனிய மார்க்கத்தில் பூத்தது நட்பு..

கல்லூரி வாசலின் புறத்தே உறவுகளை விட்டுவிட்டு

ஒன்று சேர்ந்தோம்..

அளவில்லா மகிழ்ச்சியின் ஆரவார களிப்புகள்

முடித்திட வழியில்லாமல் மூர்ச்சையானோம்..

அன்புக்கு அடிமையானோம்

சச்சரவுகளில் சமாதானம் கண்டோம்..

நிகழ்காலத்து நிஜங்களை மறந்தோம்

எதிர்காலத் தேவைகளை துறந்தோம்

கலியுக காலத்தில் கவிஞனாகிப் போனேன்

மறுமுறை வருமோ இந்த நாட்கள்..

மனதின் உணர்ச்சிகளை அடக்கிகொள்!

இன்று..

நமக்கான வாழ்க்கைக்காக உதிர்கின்றோம்

நாளைய உலகின் நலனுக்காக பிரிகின்றோம்!

காட்டுப் பய

கல்லூரி வாழ்வின் கடைசி துளி (1)

2010-05-24T15:17:00.000+05:30

மரணத்தின் வாசலை வென்று..

பூக்களின் தீவுக்குள் புகுந்து..

மலர்களின் மீதேறிய அமுதத்தின் வாசனைக்காக

வண்ணத்துப்பூச்சிகளின் சிறகுகளாகி..

ஆகாச மரங்களாகி..

அதன் அந்தரங்கத்தில் தழுவிச் செல்லும்

தென்றலில் சிலிர்த்து..

உச்ச நிகழ்வுகளோ.. பக்க விளைவுகளோ..

பகுத்தறிந்து பார்க்கும் பக்குவத்தில் உடைந்து..

வார்த்தெடுத்த கண்ணாடியின் சிதறலாகிறோம்..

ஒட்டுவது சிரமம்தான்!

நினைவுகளுக்காக

உடைந்த சில்லுகளை சேகரிப்போம்!

காட்டுப் பய

முடியும்!

2010-05-19T17:45:00.000+05:30

உன்னால் முடியும்..
"முடியும்" என்பது முடியும்குள்!

உன்னால் முடியாது..
"முடியாது" என்பது முடியுமெனில்!

--
காட்டுப் பய